消暑活動 Part One - 樂富廣場「雪糕大滿灌 Scoop and Slam」
夏天又來喇，今日嶠媽同埋芊嶠契爺契媽帶芊嶠去左樂富廣場參加「雪糕大滿灌 Scoop and Slam」。場內有兩大免費遊戲俾大家挑戰，玩完仲可以換雪糕食添！
1）雪糕當入樽 － 籃球九宮格
以雪糕為主題嘅籃球九宮格機足足有5米咁高，每位顧客有五次投籃機會，只要於指定距離成功把籃球投入雪糕筒內完成「過三關」挑戰 (連成直線、橫線或斜線)，就可以贏取一球雪糕。今日我地玩就係一分鐘內鬥入得多球，以入球數目計。芊嶠契爺就入左十一球，九格入面就差一格燈未著，但都好叻架喇！芊嶠仲好笑，拎住個波就去個欄到掉入去就以為入左，好開心。契爺都有抱住芊嶠射波，但芊嶠係唔識拋波，笑左！
2）要幾糕 JUMP 幾高 — 奇趣跳「糕」機
保證一定有雪糕食！3.5米高跳「糕」機上有多個按鈕，只要用盡全力跳到最高，最多可贏得五球雪糕架！每人有兩次機會，仲要係免費參加，按到 1 號鈕就有一球雪糕、2號鈕就有兩球雪糕，如此類推。
玩完遊戲，當時要影返啲靚相留念啦。場內有6 米闊嘅巨型｢雪糕池｣，入面有好多好多雪糕球，顏色好繽紛！仲有 2.5 米｢巨型雪糕 Cone｣ & ｢浪漫雪糕車｣，芊嶠都算比面，肯影返幾張，最開心都係係個雪糕池到影相，因為似波波池丫嘛！
話咗係免費食雪糕，究竟有咩雪糕呢？今個夏天，樂富廣場為大家帶來「十二道雪糕味」，當中有四種首創港式口味真係超特別：熊仔餅妙趣、蔗汁味、五花茶味、凍檸茶少甜味。嶠媽最鐘意係熊仔餅妙趣味，因為我真係好鐘意食熊仔餅！另外都非常推薦大家試Wasabi 味，因為嶠媽受唔到Wasabi，所以冇試，但芊嶠契爺契媽試左話都ok，但會愈食愈覺得辣。鐘意Wasabi 既朋友，一定要來試，真係夠特別。
⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️
「雪糕大滿灌 Scoop and Slam」
日期：2017 年 7 月 12 日至 8 月 27 日
開放時間：下午 12 時至 8 時
地點：領展樂富廣場 A 區美食坊
⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️
#夏日消暑活動 #樂富廣場 #A區美食坊 #雪糕大滿灌ScoopandSlam #芊嶠 #契爺契媽
Search